櫃門下垂點解決？校螺絲都有竅門

木櫃門磨到地板是家居經常出現的小問題，今集《自己屋企自己救》就嘗試修復門鉸，想知成功與否就要睇片喇！

今次櫃門出現明顯下垂，檢查後發現櫃門門鉸明顯移位，首先將櫃門抬起再稍為推入後，再利用電動螺絲批將門鉸靠內的螺絲收緊。之後嘗試調校門鉸靠外的螺絲，調校至與櫃身水平後，成功將櫃門磨到地板的問題解決。

室內設計公司負責人Alex不建議使用電動螺絲批調校櫃門門鉸，因為工具轉速太快，有機會出現「塌牙」，反而用一般螺絲批更適合。而門鉸最主要的分別是有沒有緩衝功能，部分更會加入快拆功能，毋須鬆開螺絲就可以拆出門鉸，方便移動櫃內層板。Alex補充，一般門鉸只可以調校左右、出入兩組方向，但部分門鉸亦可以調校上下位置，有需要的用家可以選擇。他指櫃門採用鏡或玻璃的話，物料較重，鉸位相對容易出問題，甚至出現櫃門下垂的情況。如果要更換門鉸，建議整個門鉸拆出來到五金店選配，因為門鉸有細分全蓋、無蓋等，容易混淆。