林泳淘險釀交通意外　城隧爆胎磨到似解體

藝人林泳淘近日突然驚傳發生交通意外，事緣佢揸車駛經城門隧道時，座駕突然發出怪聲，當時佢已心知不妙：「一入到隧道口已經聽到架車有怪聲，到中段啲聲愈來愈大聲（好似就嚟要解體咁），而且已經有啲畀油都行唔到嘅感覺，所以我就一路打住死火燈一路行，後面架車都非常機警，立刻慢駛兼同我保持一段距離，諗起最近見到私家車着火司機及時跳車嘅新聞，我即刻望向車頭同車尾，心裏面一路自我安慰，矛（冇）事嘅，當初揀車林生就係相中佢拎咗超多安全認證先買嘅！唔會爆嘅唔會爆嘅！」

佢續指當時其他行經嘅司機見狀，即提示佢落車，原來其座駕已經爆胎，成條車胎離奇消失，磨到甩皮幾乎只剩車鈴，相當牙煙，幸好未有釀成事故，佢亦感謝沿路司機及隧道工作人員嘅協助，令佢順利度過難關，總算不幸中嘅大幸！