《尋人記II》︳街坊教尋人搵方東昇　「本尊」現身超爆笑！

充滿人情味的無綫節目《尋人記II》推出以來受到觀眾歡迎，今個星期主持方東昇、黃曉瑩、李曉欣及黃靖婷繼續四出尋找回到那些年的故事主角，分別有苦候上樓的李鄭屋徙置區居民，以及在下白泥村校讀書的孩子。攝製隊跟進李鄭屋個案經歷長達半年的尋人期，撞板多過食飯，幸好遇到不少意想不到的貴人相助，有舊同學、街坊福利會理事，數之不盡的熱心住客，最搞笑是遇上「尋人記」粉絲鄭伯伯。

攝製隊幾乎每周必到「李鄭屋」游走碰運氣，期間熱心的鄭伯伯主動推介尋人妙法，他向戴著口罩的方東昇提議說：「你去搵方東昇啦！佢三十年、四十年後（嘅人）都搵到，素未謀面都搵到，你冇睇電視架咩？」方東昇聞言立即除下口罩笑說「我就係方東昇」，鄭伯伯見到「本尊」現身立即時笑到肚彎，負責拍攝的黃曉瑩也笑到手震，場面搞笑。

原來鄭伯伯受訪時剛完成白內障手術，故認不到眼前正是方東昇，他又透露節目宣傳片出現後，落街均有街坊向其表示：「你上咗鏡呀！」街坊感情相當要好。