廖慧儀成功解凍　工作接踵而來：感覺好實在

「狂野空姐」廖慧儀前年年尾因舊愛Sam（張家俊）疑為情所困墮樓身亡，令佢形象直插　水兼被雪藏，佢自己都開設瑜伽教室做導師。事隔2年，似乎公司肯亦逐步解凍，年初佢就為節目《流行都市》做星級教練教瑜伽，回歸幕前，早前並扮靚出席周年慶典節目巡禮2022，依家更喺限時動態分享新工作，宣布正式加入無綫娛樂新聞台做主播，仲入廠坐正主播枱，明顯上位：「正式加入E-news，請各位多多指教。」

廖慧儀接受東網訪問，問到解凍一事，她說：「好開心公司比機會自己，同埋都好感謝經理人、屋企人同朋友一直都好支持我出返嚟幕前工作。都收到好多朋友DM我話成日都有睇我喺《流行都市》教瑜伽。」至於擔任主播的感受？她說：「感覺好實在，好有『返工』嘅感覺，因為好多都係好實際嘅工作，例如要幾點寫好稿、讀稿、入廠錄影等等。但相反平時拍嘢係比較少返公司。好開心可以識到新同事，有機會向前輩學習。每次返工都會part住一位前輩，佢地做嘢好快講嘢語速非常快，平時做開瑜伽節奏慢啲嘅我一開始要時間適應。新同事都好好會教我點做好啲。幾中意做主播，可以練習到口才、練咬字，對之後嘅發展好大幫助。」

她坦言之前比較少留意娛樂新聞，但依家留意多了，她說：「八卦同好奇心大咗。睇嘅時候會學吓人地點寫稿，同埋盡量認到每一位藝人同佢地嘅名。依加每次錄完返屋企都會睇返自己表現如何。（會唔會好緊張？）一時時，大多數時候都係淡定嘅，因為係用母語廣東話去講會輕鬆啲，同埋暫時因為疫情都係錄影唔係直播，所以都唔會太緊張。」她透露剛剛開始，內部同事安排她做廠，暫不需要外景拍攝。除了主播工作外，她透露剛剛完成J2台一個煮食節目，現在拍緊一個行山節目，遲些會有一些talk show。