張敬軒賀演唱會破4大紀錄 慶功豪擲35萬派畀幕後
20220620
東網電視
更多新聞短片
![](/hk/bkn/cnt/entertainment/20220620/photo/bkn-20220620180110471-0620_00862_001_01p.jpg?20220620231742)
張敬軒 《The Next 20演唱會》圓滿結束,目前一共創下4大紀錄,包括「嘉賓人數最多演唱會共58人」、「最夜完騷演唱會」 、「單場罰款最多演唱會」及「疫情期間開最多紅館演唱會,分別有2020年《盛樂演唱會》共8場,2021至2022年《The Next 20演唱會》共26場,18個月唱了34場,暫時冇人能破。
完騷後,軒公並未忘記每位幫過他的朋友,於社交網中突發深夜直播,多謝歌迷之餘,更不停找家中禮物送給歌迷,又逐一相約為他做嘉賓的歌手飯局作感謝,上周軒公更開庫,宴請所有台前幕後演出及工作人員慶功,食大餐之餘更自掏腰包拿出35萬現場大抽獎,讓一眾台前幕後開心不已。
慶功宴上軒公開庫儀式用攪珠的抽紙仔方式,最細獎項銀碼是1,000元,最大獎是10,000元,務求人人有份大家開心,但抽到最後,席間不少只抽到1,000元的「苦主」高叫加碼,結果每人變得到3,000元,然後抽到2,000元的幾十人又起哄,軒公見群洶湧,慷慨再開庫:「好!既然撳咗啲錢出嚟!老闆教落攞咗出來就唔好收番!」最終全晚一共抽了近35萬元現金獎,人人有份永不落空,連因工作未能到場的工作人員,都一樣抽到,個個滿載而歸。
軒公開庫之外,席間亦親自答謝每個組別的工作人員,感謝所有人對演出的貢獻,自言完騷至今,每晚演出仍歷歷在目,有很多關於演唱會的感受、製作故事,以及千言萬語想多謝各單位,打算於稍後再於社交網表達,揚言「長文情入」着大家留意。
今次演唱會之後,網上留言都指軒仔播「毒」,令眾多入場觀眾都患上「演唱會後遺症」,對其演出念念不忘,希望重溫入紅館睇騷,而網上重溫軒公嘉賓環節的收看次數,累積近3至4次,並收到不同的聲音。軒公早前亮相網上節目時,又自爆年尾想再開騷。
疫情期間,軒公已創吓「疫情期間開最多紅館演唱會」的紀錄,問到演唱會總監馮貽柏(Alex),年尾再開係咪想再破紀錄?或者再創單一歌手,1年開2次大騷紀錄?Alex表示 :「係呀,喺疫情期間,做到咁多場騷呢個紀錄,我哋永世難忘!係咪重可以創新紀錄?依家研究緊,研究到一個與別不同的方案,係有機會再開!我哋要不斷挑戰新高度嘛!不過依家都重係商議階段中,有消息會同大家公布!其實唔單止香港對軒仔有渴求,世界各地都重有好多人問緊,我哋會唔會帶呢個騷去巡迴演出,當然我哋係好想個騷變成世界巡迴演唱會啦,但都要睇疫情,希望疫情漸緩,大家回復正常生活,就會開始計劃巡演,大家咁掛住個騷,或者到時跟我哋去世界各地,旅行睇騷囉!」