甄采浠發夢都想生B：生夠7個都冇問題！

藝人甄采浠今午（21日）出席健康護理公司活動擔任代言人，她自爆想學習「陪月」：「想學好耐啦。（想入行？）學多啲將來自己坐月都有幫助嘛，我細佬將來結婚生仔我又可以幫手。」她笑言自己經常發夢生B，雖然暫時感情空白，但已打算將來結婚後必定會努力造人：「至少生2個，生夠7個都冇問題。（生7個係咪擇偶條件？）都係㗎，哈哈！隨緣啦，生一個都冇問題，唔係話想生就一定有嘛。」自言喜歡小朋友的她，坦言不會為生BB而雪卵：「我唔係反對人哋咁做，但自己比較自然為主，情願Keep好啲個身體，一切隨緣啦，如果我60歲先遇到我嘅Mr.Right，到時我咪領養囉。」

她透露將於9月拍住同門師妹李妍及蘇家欣齊齊開騷，她說：「啱啱先落實，好驚喜，不過雖然我入行比佢哋先，但單飛喺舞台嘅經驗佢哋多過我，我先係師妹。（會跳舞？）未必好似以前組合咁跳勁舞，想唱情歌。」她表示將於稍後發布新歌。