李佳芯拍綜藝忙過拍劇 馮盈盈再做《好聲好戲》

20220622
東網電視
更多新聞短片
藝人李佳芯(Ali)、馮盈盈及阮兆祥等晚上(21日)為無綫節目《好聲好戲》進行錄影,Ali表示近來雖未有拍劇,但其實工作未停過,她説:「我係一個停唔到落嚟嘅人,呢段時間除咗做黎諾懿嘉賓,又做洪永城嘉賓,同埋一直有讀關於情緒上嘅課程,我發覺身邊好多人都有情緒困擾,做我哋呢行好容易畀工作、生活同屋企影響情緒。」她表示希望能學以致用,將來能幫助自己及身邊人,又指除演藝事業外,讀書亦是她想繼續鑽研的事情。
談到今次於節目中參與配音環節,她透露配音曾令她有過陰影:「十幾年前天生哥(龍天生)搵過我配幾場戲,當時係配熊黛林,係搶婚戲要嗌到聲嘶力竭,覺得好難、好氣餒,又成日NG,覺得自己做得唔好。」坦言很想趁今次機會學好配音的她,被問到會否擔心被批評時説:「都唔係第一日做呢行,企得喺度就預咗畀人話,我情願大家講真説話,我都想進步。」問她何時再拍劇?她指自己很被動,等待公司安排,又指近期正執導拍攝關於腦退化的短片,希望今年內完成,令更多人認識腦退化。
至於上輯作為參賽者的馮盈盈,今輯以主持身份參與節目,坦言當參賽者時壓力較大,她説:「今次做主持輕鬆好多,上次做參賽者我永遠活喺自己世界度,不停掛住練習。」她表示今次雖然輕鬆了不少,但作為主持仍有一定負擔:「同祥師兄要負責晒成個流程,多咗嘢記,仲要負責同啲參賽者打氣、鼓勵、減壓,分享自己心得,責任重大。」問到現時作為多個綜藝節目主持的她,有否定下目標成為「最佳節目主持」?她説:「絕對冇諗過,之前《後生仔傾吓偈》攞過『最佳綜藝節目獎』,但我只係其中一個主持啫,至於個人嚟講就冇諗過向『最佳主持獎』進發,始終知道自己仲爭好多,不過近排多咗機會去練習同學習,仲有好遠。」她還打趣説要向阮兆祥拜師,學習搞爛Gag。