林作自稱收陳凱琳家人回覆　大家姐Joyce嫌100萬出手低

前姐陳凱琳（Grace）與弟弟Derek因上載與父親合照，被愛「抽水」嘅林作嗌父子二人驗DNA證實父子關係，仲會付100萬作「餌」，結果被全城鬧爆！已轉「網紅」路線嘅Grace，聽日（23日）係31歲生日，依家佢就主力晒慶生片段，入面除咗見佢親自預備海鮮美食，搞80年代主題生日P，仲順手晒佢同老公鄭嘉穎一家四口及好友家中預祝生日嘅片段，放閃兼晒幸福。

網友除咗湧入佢社交網留言大讚佢靚女，又送上生日祝福，不過都有網友質疑佢此舉有轉移視線之嫌，事關林作挑機驗DNA一事，Grace全家人都未有正式回應，似乎係想避談事件。不過林作今日（22日）上午發文，就事件指收到線布會有「重大消息」公布。

他在社交網表示事件有新進展，他表示得到陳家的回覆，而且內容震撼，他寫道：「我宣佈我今早獲得陳家私下回覆，距離探究究竟是隔代遺傳還是隔壁遺傳又近了一步。過去兩小時Follower只多了200人，這樣吧，IG（追蹤人數）到達40K，我就會post出完整回應。Facebook page上此post上到1k like我也會post。如果post出嚟唔收貨，我切。包震撼。」

林作之後發文，指陳凱琳家姐Joyce都Follow了他，Joyce昨晚（21日）已於你社交網留言指：「林作先生，100萬會唔會少咗啲？」林作見陳家人就事件公開發言，即表示：「Joyce姐忘記，其實多年前，我為了探究究竟佢哋係咪親生而用我自己私人Facebook Add咗佢。佢嘅意思，係願意做test，但價格出手太低！明白嘅，始終我用緊自己錢，人哋講緊家族顯赫，區區得100，你估我細佬Derek喺嗰個Derek咩！收到，本人馬上聯絡身在深圳嘅林母，睇下佢可否番嚟幫拖。我馬上聯絡我媽媽，大家畀少少時間我，我睇吓可以點樣加碼。」對於林作將追蹤人數及帖文Like數當籌碼，有網民表示： 「乞Like乞到咁真係好折墮。」