林作母親加碼1千萬 求驗陳凱琳細佬父子DNA

2022年06月23日 13:06
東網電視
更多新聞短片
前港姐陳凱琳(Grace)同龍鳳胎細佬Derek日前趁住父親節晒出同爸爸嘅合照,點知因Derek膚色、混血兒外貌同爸爸「唔似樣」,搞到「抽水王」林作揚言願意用100萬買Derek父子DNA證明,不過Grace一家人齊封口,未有回應過一句,Grace今日(23日)31歲生日,佢更加大方晒出當日被林作「抽水」嘅海量全家福,用行動力撐親情永在!
一家人一條心,Grace以同一批合照做「無聲反擊」,並以英文留言指自己一家有愛、有歡樂,又互相支持,父母更加係佢同細佬嘅全世界,以行動去證明永遠都係一家人,擺明唔理林作嘅一系列舉動。
而前日(21日)陳凱琳家姐Joyce留言寸林作:「100萬會唔會少咗啲?」今日林作即刻嚟料,晒出同林母嘅對話截圖,內容見佢向媽媽借夠500萬,不過就未見林母回覆,但林作繼續賣關子,話佢媽媽已經用文字覆咗,再次借新聞吸引大眾眼球。
到咗今日傍晚6點幾,林作又喺社交網晒出同媽媽嘅對話截圖,留言:「Joyce姐,最新消息:我老母大你1000萬!今次驚未!」喺圖中睇到林媽媽同林作講:「仔我決定去碼一千萬畀你,將個DNA進行到底」、「你老母幾時都會撐你」即時引起網民熱議!