女偶像託運愛犬接機已變屍體　全國鬧爆成熱搜第一名

前內地女團火箭少女101泰籍華裔成員李紫婷，團體解散後，佢就留喺中國發展演藝事業，不過疫情下佢已經2年冇返泰國，近日佢就特地將愛犬由泰國接到中國同住，點知尋日（25日）一早佢抵達機場時，竟發現愛犬喺運輸過程中已經死亡，佢仲喺網上崩潰哭喊，仲嬲爆發問：「今天早早的去到機場等待清關、迎接牠，可是當清關人員接到時發現狗狗早已沒有了氣息…我的狗狗到底發生了甚麼？」

佢表示曾試圖想查清楚狗仔喺運輸過程到底發生咩事，但卻聯絡唔到負責運輸嘅航空公司，搞到佢心痛控訴：「我們看到的是狗狗和貨物一起，經歷高溫運送。沒有人可以給我準確答覆，狗狗也不能出來進行進一步檢查。經歷過一天，懇請航空公司給我一個結果！」而李紫婷本身人氣不俗，今次事件即引起外界關注，粉絲紛紛幫手去航空公司官網留言要求有所交代。而今日（26日）稍後，航空公司急急發文指正調查事件，並會盡快畀李紫婷提供調查結果，不過事件已經成為全國關注新聞，火速成為熱搜第一名。