蔡嘉欣自畫黑眼圈造假　網民喪插侮辱智慧

前落選港姐蔡嘉欣出名是非多多，飽受負評嘅佢曾經嘗試反擊網民，但始終都係失敗告終！佢入行以來一直被封做「拜金女」，早前仲索性自嘲係「拜金KOL」嚟拍片吸金添！日前佢就為美容產品宣傳，話貼咗個去眼圈眼膜，就可以用20分鐘去除黑眼圈喎！

不過片中睇到佢其實自己專登搽黑咗眼圈，仲同大家講：「你睇我黑眼圈幾勁！」之後佢就貼上個眼膜，等夠鐘之後佢剝開個眼膜，好驚訝咁話：「嘩！個黑眼圈真係消失咗，好神奇呀！」網民睇到佢咁樣「自編自演」梗係唔收貨啦，仲喪插佢咁樣「造假」實在太冇誠意，簡直係侮辱大家智慧呀！未知係咪見「出事」，現時該影片已關閉留言功能，暫避風頭。