娛刺撈飯︱失無綫靠山 余德丞真係行錯棋?

2022年06月27日 13:00
東網電視
更多新聞短片
有人入,自然有人出,無綫咁大間公司,人來人往都好正常,啱啱簡淑兒就喺零預警之下離巢,不過佢人氣同知名度始終爭啲,所以坊間冇乜迴響。上一個離開無綫,真真正正令人有「吓,竟然咁都走」感覺嘅藝人,肯肯定係余德丞。大家都仲好記得《青春不要臉》,喂等足九年終於有男一做,前途一片光明喎,到依家做KOL以自由身搵食,搞到最近畀人告,唔知Dickson有冇後悔呢?
余德丞離開無綫之後轉做KOL,同2個YouTuber合作拍試食片,主題係挑戰劣食,三個男人對一間扒房餐廳嘅食物好唔滿意,踩到盡之餘仲講晒粗口。扒房老闆對佢哋嘅批評好不滿,最後決定去差館報警,話告晒佢哋三個,仲連YouTube都告埋。扒房老闆之後接二連三發出公開信,叫余德丞向佢道歉,而Dickson就回應話,佢只係講番對食物嘅個人感受啫。
喺一間公司做咗8年,仲要係事業啱啱有起色,喺呢個時候離開,話余德丞冇掙扎就假。Dickson都同記者講,離巢之後冇咗大樹遮蔭,收入肯定唔穩定,亦都承認做YouTuber搵得唔多,話一定有擔心,連媽咪都擔心埋一份。Dickson加入TVB之後,曾經做過兒童節目,但因為後生靚仔身材好又有觀眾緣,終於有機會拍劇,喺《誇世代》入面騷朱古力腹肌,《福爾摩師奶》做人力車伕都搶鏡。到咗今年,Dickson更加做埋男一添。
睇番無綫劇近年走勢,上年台慶劇《拳王》平均收視得16.1點,《青春不要臉》收視過廿點,直頭係叫好又叫座,睇到觀眾對TVB劇嘅確切要求,就係希望睇到創新嘅劇本,同埋新鮮嘅面孔。Dickson個勢咁靚,又有觀眾緣喎,如果肯續約,未來一定更加入屋。就算撇開呢啲唔講,如果Dickson冇離巢,應該冇時間,又或者公司都唔會畀佢拍嗰條踩界試食片,依家就唔使畀人告啦。
Dickson曾經話自己係典型處女座,所有嘢都會諗過度過先去做,所以離巢咁大件事,肯定唔係一時衝動嘅決定。余德丞話,如果呢一刻續約,又會唔知續多幾多年,自己已經33歲喇,佢驚依家唔去試,第時想變已經冇機會,所以最後都係走。其實回復自由身之後,佢個YouTube Channel嘅訂閱人數,短短幾個月由萬幾大幅升到接近七萬,似乎唔少年輕網民,都好撐佢離巢喎。
你可能話,Like數只係浮雲,不過廣告商就肯定唔會死錯人。睇番余德丞個IG勁多業配,佢亦都承認最近有人用六位數字搵佢拍廣告,點睇佢都唔似撈唔掂喎。仲有呀,佢最近頻頻上viuTV做嘉賓,仲做埋電台節目主持,連佢拍檔Do姐鄭裕玲,都讚佢係可造之材,睇嚟Dickson嘅世界,真係可以無限大。
成日睇IG、Facebook啲港女人生格言,其中一個最呃到Like嘅,就係做人應該要喺適當時候跳出Comfort Zone。道理係人都知,但真正敢去改變嘅,點計都只係少數。不過要離開舒適圈,都要睇吓自己有幾多料嘅,Dickson本身係富二代,佢屋企手揸億億聲物業,就算呢次博衰咗,頂多只係冇面,經濟上根本唔會有問題。仲有佢假假哋都做過TVB男一,已經有基本知名度,所以離巢之後都Keep得住聲勢。
余德丞最近話,暫時都唔會再簽公司,第時想搞自家工作室,擁有自己嘅團隊搵真銀。有人話,路,係人行出嚟;但其實路,應該係由叻人行出嚟。Dickson後生有腦又肯搏,的確係值得擁有海闊天空嘅康莊大道。