黎耀祥《日日媽媽聲》發表愛的宣言:有太太嘅人生我先會幸福

2022年06月27日 21:01
東網電視
更多新聞短片
視帝黎耀祥為無綫節目《日日媽媽聲》第二輯任嘉賓,分享與兒子的相處點滴。他表示對方已長大成人,雙方距離感雖然變大,但感情仍然十分深厚。當他被問到對兒子有甚麼期望時?他笑言:「好奇怪,好多父母都話冇所謂,但當小朋友長大之後,你會期望佢成為你心目中嘅人,但慢慢就會放棄,因為知道呢個願望係唔會實現,始終大家行唔同嘅路,價值觀都唔同。」出名愛妻號的他更感謝太太多年來支持,並發表愛的宣言:「太太無論在工在私都幫咗我好多,做得演員都係怪怪地,好多嘢都會諗埋一邊,佢開解咗我好多,有太太嘅人生我先會幸福好多。」
而出名孝順的戴耀明則帶同媽媽參與節目,並分享兒時母子二人窩心事:「細個成日便秘,醫生叫我要做多啲運動,之後阿爸阿媽就陪我行樓梯,每日十次、八次左右,記得阿媽嗰時話:『第日阿媽年紀大咗,陪唔到你咁樣行,大個咗唔好再便秘,衰仔!』」為感謝媽媽多年來的照顧與支持,戴耀明送上手寫心意卡,並即席讀出內容,表示望母親有生之年能開心過每天,食多點好食的東西。至於沈可欣與姚瑩瑩亦齊齊分享湊仔心得,同聲指升呢媽媽後,凡事以小朋友為先,身為兩子之母的沈可欣自責做得不夠好,更哽咽說:「睇番啲相覺得Miss咗啲嘢,因為工作陪少咗佢哋,我係有Guilty嘅,有時返到屋企佢哋已經瞓咗覺,好似冇咗同佢哋一日嘅時間,作為媽媽我自覺做得唔夠,應該要陪佢哋多啲,教佢哋多啲嘢。」