港姐變髮!Astrid爆炸頭冇變過 幸運攣毛被指激似苟芸慧

20220628
東網電視
更多新聞短片
《2022香港小姐競選》入圍佳麗今日(28日)到髮型屋接受髮型師「變髮」,其中「連詩雅師妹」邢慧敏(Sharon)最快變身完畢,見佢剪短咗少少頭髮,變化不大,佢指自己以往紮頭髮多,髮型師幫佢捲曲咗少少頭髮、剪短咗,睇落成熟咗,自己都好鍾意。問到入圍有乜準備?佢就表示:「都要減少少磅,因為自己都有少少肚腩仔,自己都鍾意做跑步瑜伽,希望練番啲線條。」至於今早不慎露Bra走光嘅何詩琪,剪短咗2至3吋頭髮,髮尾微微電鬈,被問到走光一事,才驚悉自己走光,即不停拉高領口,表現錯愕,指下次會小心。
其他佳麗包括王子蝶、Yohanna等沒有太大改變,Ceci則由直頭髮,變成髮尾微微捲曲,而眾多佳麗中,林俊賢女兒林卓錡i變化最大,髮色由橙色變成深啡色,感覺自然。至於一直因爆炸頭而備受關注嘅Astrid,「變髮」後爆炸頭原封不動得以保留,佢表示:「同髮型師商量過覺得都係保留呢個髮型好,呢個髮型第一次整,留咗兩三 個月,自己鍾意嘗試,髮型帶來好運。(髮型引起關注?)除咗關注我頭髮,亦都可以關注我其他嘢。」講到有指佢似苟芸慧,佢就指:「都幾好呀。」
另外,以熱褲現身嘅張可欣,頭髮剪至及肩,佢用唔咸唔淡廣東話表示:「剪多咗少少,冇染髮(你唔想染頭髮?)造型師話冇需要染。」而染深髮色嘅楊溢則指好鍾意新轉變。至於郭秀雲提名嘅梁家琪,剪短及做咗treatment ,佢覺得新髮型好靚,問到如何備戰,佢表示:「冇備戰,以平常心,(郭秀雲有冇教路?)叫我要自信,多笑容,enjoy 個moments ,(有冇信心?)有信心,(造型後信心再大啲?)信心大啲,因為靚啲,畀自己90分,仲有10分可以努力。」而「翻版孫藝珍」梁超怡、美國回港嘅海外佳麗Wendy及Hebe等最遲到場,屯門實習醫生Chole則有事未能出席,共得19位佳麗現身。
較遲現身嘅Hebe與Wendy同樣變化不大,稍為修剪就完成,而Cherry及Chrissy(陳婉怡)就整得最耐,分別整咗4個半鐘及5個鐘,不過望落改變不大。至於屢敗屢戰嘅張靜婷(Janice)今次終成功入圍,張靜婷原本淺色頭髮,變得再淺啲,佢指:「因本身好耐冇整頭髮,個頭較扁塌,依家變蓬鬆,染咗淺色,好新鮮好Young,後生咗5歲。(髮色上變化最大?)真㗎?未影畀屋企人睇,一陣出去影,好開心,估唔到可以做highlights 。」