又做父女又談情︱陳山聰想搵劉穎鏇做契媽

藝人陳山聰和劉穎鏇今日（28日）出席無綫回歸系列電視劇記者會。二人繼《大步走》後，今次再於單元《我的驕傲》內扮演父女，受訪時山聰笑指除演過父女外，他們更曾「談情」，關係複雜。記者打趣笑指二人這麼有緣，何不考慮上契，山聰笑答：「做我個仔契媽囉，到時準備張清單禮物表先！」

山聰於單元內扮演升旗手，他大感興奮謂：「人哋學足兩年，我就喺開拍前花咗5日喺黃竹坑受訓，好彩操咗幾日都被讚有板有眼。（最難忘啲乜？）要19吓配合埋國歌扯好支旗，所以唔可以受任何嘢擾亂，心裏面要有拍子。今次係我首次踏上金紫荊旗台，嗰度升起嘅國旗唔可以隨便拉返落嚟，所有嘢我哋都係拍大特寫加後期製作。」

至於劉穎鏇於戲內化身籃球健將，能夠將興趣融入工作她相當高興，但透露：「今次我要講國語，自己完全唔得，喺屋企不停咁練習，同聲自己嘅聲帶，臨場又要搵同事幫手執一執，大家就嚟聽到我首次普通話對白，應該算係最標準嘅一次。」