童時愛上你︱霸氣高海寧消失　8歲彤彤正式登場

藝人張振朗和高海寧主演的劇集《童時愛上你》昨晚（27日）首播，而第一集的焦點當然是落在女主角高海寧（高Ling）身上，飾演女強人雷紫彤（Amanda）的高Ling於首集已霸氣外露，工作上表現硬朗和咄咄逼人，試過因下屬開會遲到直接發警告信，相當不近人情。對着野心勃勃的哥哥雷德信（袁文傑飾），她亦從不處於下風，袁文傑為了生意強迫高Ling陪客食飯，面對客人企圖不軌的高Ling不忿向對方潑紅酒反擊之餘，更用高踭鞋踩到對方骨折！不過，霸氣的高Ling於今晚一集中就會消失，網民都甚期待她演繹的8歲彤彤「現身」。

而昨晚最大亮點，非高Ling素顏上陣莫屬！劇情講到她為了邀得人氣化妝界KOL「Ding哥」（張振朗飾）合作，不惜落妝展現「真面目」讓Ding哥「大顯身手」，高Ling出名皮膚靚，索顏上陣絕對冇問題。張振朗的角色雖然脂粉味略重，但劇中亦有多場晒肌鏡頭，大玩引體上升兼舉啞鈴，吸睛度爆錶。