港姐2022︱實習醫生Chloe係港大尖子　誓做麥明詩2.0

新一屆港姐經過3輪面試後，20位候選佳麗喺日前進行「變髮」大改造時，正式見人，不過當日因事缺席嘅屯門醫院實習醫生Chloe，忽然被起底，原來斯斯文文又有禮貌嘅佢，依家25歲，畢業於港大內外全科醫學士，現於屯門醫院任職實習醫生。

據悉Chloe於求學時期成績優異，喺以醫學院聞名嘅港大要讀夠7年（學位6年、1年實習），先有資格獲聘為駐院醫生，其內外全科醫學士（MBBS）收生分數全校最高，而專科則要再進修，但起薪點已逾5萬元。

不過家住半山嘅Chloe，可能都唔多Care薪酬，佢與父母同住，屋企客廳與飯廳相連，飯廳除有水晶燈之外，亦有8人圓型餐桌，而客廳則放有兩張長型梳化，屋企更可以飽覽維港景色。加上Chloe享受生活，閒時學烹飪，又同港姐冠軍宋宛穎齊齊去Art Basel Private Preview，高學識又愛Enjoy Life，未正式選戰就已經係人生勝利組，同早年挾「10優港姐」之稱嘅前港姐冠軍麥明詩有得揮。