74歲婆婆搶唔到MIRROR飛 網民嗌心酸籲設關愛座

2022年07月02日 09:24
東網電視
更多新聞短片
人氣組合MIRROR演唱會一票難求,近日電台DJ彬臣分享一位74歲婆婆撲MIRROR嘅故事,感動唔少網民,成為一時熱話。彬臣透露媽媽託佢買飛,原來係公司嘅清潔嬸嬸購買:「呢位嬸嬸74歲,未退休。你都知道老人家要去接觸科技嘢真係唔簡單,尤其網上買飛唔似我哋有晒攻略,事前已經知道晒啲步驟、準備好晒啲資料,第二朝未夠鐘已經上網F5緊。」佢指對婆婆而言現時購買程序太過複雜,而婆婆更為此特意加入官方歌迷會成為MIRO,無奈最終都未能搶到門票:「佢足足上咗兩日網,最終都撳唔到,仲喊咗幾日!」
彬臣坦言被老人家願意花時間和心機學習上網買飛的誠意所打動:「我深信佢除咗自己睇之外,背後可能想同孫仔、囝囝女女,一家人開開心心去睇,呢個故仔真係令我印象非常深刻,佢學點樣買飛,聽到佢喊咗幾日,我個心乸乸哋。」但始終愛莫能助,網民同樣感到心酸,認為應設有關愛座:「點解演唱會唔可以有關愛座飛賣?難得上咗年紀嘅老人家都咁有心去睇演唱會」,有網友則和應指官方要預留門票給尊貴客戶:「都冇預普通人會買到飛」。