涉學歷造假被鬧足4年　翟天臨揚言要還自己清白

劇集《蘭陵王》飾演反派「高緯」而爆紅嘅內地男星翟天臨，於2019年捲入「學歷造假」風波，被指攻讀博士期間涉嫌抄襲學術文章，最後被徹去博士頭銜，更賠上演員事業，依家一直被視為「劣迹藝人名單」之列，未見再有現身幕前。不過佢最大「成就」係令到中國教育部因此下令嚴格審查論文重複率，令每年即將畢業嘅研究生都湧入佢社交網留言洩憤。

被罵足4年嘅翟天臨，尋晚（3日）忽然嚟個大暴走，同網友罵戰，有網友留言話：「由於你破壞規則導致規則更加嚴苛，使遵守規則的那群人難受的一批，所以人家罵你情有可原！」翟則就反擊：「論文要求應該嚴，以前也沒有不嚴。寫論文會來怨我的人們：規則一直在那裏，你們抱怨規則嚴格，到我這裏洩不著憤，我也不會聽。少在這捏軟柿子以為自己多能耐，寫不過不符合規則是你能力不行，我又沒讓你不通過，怨得裏我麼真有意思」

佢仲表示自己嘅論文冇問題，但礙於「當時的情況波濤洶湧，基本不讓人說話」，佢先會不欲多談，並表示正考慮公布當初資料，還自己一個清白，未知會否順手洗走埋佢「劣迹藝人」個朵呢？