谷婭溦廣州處女騷撞正打風　觀眾冒雨擠爆場地

歌手谷婭溦日前在廣州舉行音樂會，此乃她在內地首個個人騷，能夠圓滿結束她滿心歡喜，溦溦說：「之前係好擔心，因為嗰幾日廣州打風，連續兩日都橫風橫雨，我好驚觀眾唔嚟，開騷嘅上晝仲係好大雨，我4點出門口準備先慢慢細雨，但好開心係全場爆滿，有啲人連位都冇，企喺後面企足幾個鐘睇，好感謝大家冒咁大雨都嚟支持我，估唔到第一次喺內地開騷就咁爆。」

開騷當日接正是她農曆生日，她的朋友、公司同事準備了驚喜給她，她說：「我綵排時佢哋突然推個生日蛋糕出嚟，台上一班樂隊老師即刻湊起生日歌音樂，最搞笑係我自己喺台上唱生日歌畀自己聽，到夜晚開騷，有工作人員整咗幾個我最鍾意嘅波波氣球，臨尾我拖住氣球出嚟encore。」由於疫情關係，她個騷要精準絕不能超時，結果她連換衫時間都冇，惟有一條裙唱成晚。