放水着相網民唔收貨　譚嘉儀玩食字Gag解圍

歌手譚嘉儀雖然嬌小，但身材玲瓏浮凸，近期頻頻着泳裝出海騷Quali，只是性感相令網民大叫「唔收貨」，皆因只得白滑玉背，令網友忍不住「求正面」，對於眾人訴求，她接受訪問時表示無能為力：「得呢張相咋，嗰日冇乜影相，我份人好唔正面，自己平時影相都係以感覺舒服為主，所以唔係特登想賣弄性感，希望原諒我啦， 哈哈。」

問到她近期已第N次出海，她竟然說曾是怕水之人，更不諳泳術，可是自迷上Wakesurf後就變成另一個人：「慢慢克服咗驚水呢個恐懼，依家好鍾意去海灘或者玩水上活動，尤其喺呢啲咁熱嘅天氣，最啱就係游水或者好Relax咁浸喺水度。」

嘉儀被指家住豪宅又住近海邊，可考慮添置私人遊艇？她嘩嘩聲說：「我係好喜歡出海，但係買遊艇就太貴啦， 得閒跟啲朋友出海已經好開心。」至於可擔心曬黑，她就話只要做足準備工夫就沒問題：「 每一次玩水上活動，都一定會做足防曬，同埋着保護衣、戴帽，所以都冇咁容易曬黑，最緊要係唔會曬傷。」