楊祐寧補擺婚宴　《華燈》林心如楊謹華誓踩場

台灣男神楊祐寧去年因演出神劇《華燈初上》，依家已經坐穩一線之位，不過一早就有妻女嘅佢，2020年就同小7歲、從事時尚保養產業嘅太太Melinda登記結婚，囡囡「Anah」12月出世，依家已經1歲6個幾月，不過當時未有擺酒，日前就傳出佢將於7月31日，嗻台灣靚酒店補辦婚宴，受邀賓客包括他《華燈》最強拍檔林心如、楊謹華及至交張孝全、張鈞甯等超過50位大卡士圈中好友，仲有藝人證實將參加婚禮。

台灣疫情未退，入場名單就有曾確診嘅藝人，楊祐寧經理人Gaby坦誠目前婚禮係規劃同籌備中，賓客名單已陸續邀請，但都未正式確定，而被邀請嘅都係新人自己嘅親朋好友，連經理人都唔清楚有邊個，目前喜帖都未正式發出。

問到疫情仍緊繃之下辦婚禮，Gaby代為表示屆時會按照防疫規定嚟做，盡力做到最完整防護，除消毒、量體溫，亦會提前準備快測包寄畀所有賓客、工作人員及採訪媒體：「希望大家開開心心參加、平平安安回家！」Gaby續指楊祐寧呢半年好好陪家人，月底辦完婚禮後，就要開始還工作債，下半年再有新戲要開拍。