港姐2022︱張靜婷否認有整容:歡迎搵醫生檢驗!

2022年07月05日 17:04
東網電視
更多新聞短片
《2022香港小姐競選》20位佳麗今日(5日)於酒店會晤傳媒,(17)張靜婷與(20)梁家琪分別獲「星級提名人」王贀誌及郭秀雲支持,信心倍添!曾多次報名參加選美的張靜婷說:「因為之前未正式入圍,所以唔想提王賢誌,其實我哋係好好嘅朋友。(佢有乜秘訣提醒你你?)叫我最緊要休息多啲,同埋笑多啲。」
對於不少網民批評她樣貌似曾經整容,她說:「我係純天然嘅,歡迎搵醫生檢驗,況且我鼻敏感唔搞得咁多嘢,不過聽到都有啲開心,即係話啲人整完容似我。(最自信係乜?)我覺得自己身材較其他佳麗偏瘦。」梁家琪則指郭秀雲未有給她太大壓力:「佢都係叫我放鬆,享受每一刻。(覺得自己有咩優勝之處?)雙眼囉,朋友話我對眼識得笑。」
(4)許子萱與(15)張光怡屬本屆入圍佳麗高學歷一族。前者近日更同時獲得劍橋及牛津MBA課程取錄,且早於22歲出版自傳,與大家分享華爾街投行上班經驗,稍後會有英文翻譯版面世,而後者剛於7月1日正式獲得註冊醫生資格。二人不約而同暫時放低專業去追夢。許子萱說:「屋企人都好支持我,如果得獎我諗我會延後進修課程。(挑戰麥明詩?)都希望青出於藍。」談到曾於華爾街上班,她相當自豪說:「錄取機會差唔多得1%,返工好辛苦,我出書都係想寫低經驗同後輩們分享吓。」
張光怡早前被發現家住半山,不過她避而不談家底,只表示會盡力做好自己,及每部分爭取最好表現。對於暫時放下醫生資格,她同樣表示得家人支持:「話晒一世人得一次機會嘛!」