姚焯菲校服Look上陣拍MV　仲搵到兩大「天后」加持？

「國民初戀」姚焯菲（Chantel）早前捲入連串風波，心情逐漸平復嘅佢近日就同家人離港去到新西蘭旅行，但依然不忘為日前推出嘅新歌《#BFF》造勢，連日來於社交網出甫宣傳。新歌中15歲嘅Chantel做番學生妹，着上校服Look示人，同落選港姐謝恩靈飾演一對閨蜜，演繹少女情懷，認真青春無敵，而最大驚喜就係MV邀來TVB藝人王菲及葉蒨文飾演2人嘅成年版，巧合地佢哋同樣撞名天后，而唔知係咪有「天后」加持，新歌成績亦非常理想，上架不足兩日MV瀏覽量已突破18萬，更獲網民洗版式狂讚，氣勢強勁。

而Chantel嘅一班粉絲「小菲象」，亦於港島區6個巴士站燈箱買下應援廣告，落力為偶像新歌宣傳。另外，身在新西蘭嘅Chantel亦有喺社交網分享行程，透露去到「HOBBITON MOVIE SET」景點，即係電影《魔戒》入面嘅哈比村，即拍下美麗風景留念。