演唱會商品冇得優先訂購　MIRROR粉絲怒插：入會有乜用？

人氣男團MIRROR將於7月底舉行首個紅館演唱會，尋日（6日）MIRROR社交網就發布演唱會周邊商品嘅相片，當中有襟針、口罩、相集、毛巾、應援扇等，任君選擇。不過有課金入官方歌迷會嘅粉絲（MIRO）就非常不滿今次嘅周邊商品冇得優先訂購，更怒插：「唔知MIRO有啲乜係優先，演唱會飛無得優先訂，連周邊都無得優先訂，不如講吓入會有乜用？」又有粉絲話：「完咗演唱會先出貨，買黎做乜？」、「都唔知邊個設計既，仲肉酸過上年嘅。」睇得出一班粉絲好嬲嬲豬呀！