方媛大玩公主風　自帶光環去生日P意外搶Fo

天王郭富城索妻方媛早前就自爆慳家，出去玩着啲衫都係「淘」番嚟，精打細算更顯穿搭Taste，專掃平衫嘅佢僅用$220就打造出天王嫂氣場！近日佢就出席好友生日P，見佢晒出嘅合照中，場地布置高級，環境設置、餐桌上都擺滿鮮花，周邊環境仲有大量氣球包圍，明顯場生日會花費唔少，方媛朋友似乎都非富則貴。

不過當晚大會點搞都好，都唔及方媛悉心打扮咁搶鏡，見佢以一襲黃色掛頸閃鑽連身短裙現身，佢就指自己係配合指定Dress code公主風出席，大晒白滑香肩及長腿，並留言：「衣櫃裏找出來一件黃色連衣裙，我們的開心聚會，生日大快樂。」今次場面大，方媛連啲衫都落本啲，今次條裙仔係嚟自一法國品牌，佢身上條裙就索價人民幣$3,400（約港幣$4,000），雖然未係天價貨色，但都凸顯方媛重視好友，同平時啲衣着比都已經好貴喇。