前華姐冠軍鄧佩儀去年被指在拍攝台慶劇《換命真相》麻煩多多辣㷫同劇演員，導致榮升女一後即一劇玩完，被掟入雪櫃，及後更敗走加拿大，至今已近大半年時仍未有歸期。而近日就有消息指原來佢留喺加拿大讀書，其實佢選美入行時，尚有1年先完成大學學位，但仍決意回港發展，據知佢喺今年1月就開始重投學生身份，重返加國名校UBC尚德商學院完成工商管理學士學位，以及修讀有關電影製作課程，有指佢此行係向無綫請假，但完成學業後嘅去向依然係未知之數。