走入紅燈區︱沙律泰國拍節目被當地人誤以為係泰妹

藝人張沛樂（沙律）今日（21日）出席香港開電視旅遊節目《重新出發》宣傳活動，她透露早前到了泰國19日拍攝節目，她表示：「好開心，同以前去泰國旅行差唔多，今次節目想比觀眾睇吓泰國喺疫情前後有咩分別，見到有啲夜市嘅舖頭執晒，同埋少咗好多遊客。（點解搵你去泰國？你係泰國通？）可能我似泰妹啩，當地人都覺得我個樣似泰妹。（有冇當地人搭訕追你？）冇人溝我，我拍節目時畀工作人員包圍住，我哋好專注拍攝。我哋雖然有去紅燈區，但只係食飯，冇睇表演，其實我都好想睇吓脫衣舞，我從來冇睇過，不過當時大家都寧願返酒店休息，但都感受到個氣氛，大家都係當在當下，我覺得個態度好好。」

另外，對於她會擔任香港開電視水着選美騷的導師，她說：「我會做導師，我都係今日先知。（你會教參賽者乜嘢？）我哋仲傾緊，睇吓點做好。啲人成日標榜我個身材同性感，我希望佢哋通過比賽搵到自己，我想同佢哋傾偈畀佢哋知道自己參賽嘅目的同發掘真正嘅自己，個節目先有意義，而唔係好單一咁定義性感，性感係冇一個定義，活出自己最重要。」