JW孖「新人王」炎明熹網上開Show　 邀「國民女神」姚焯菲做嘉賓

「聲夢」導師JW將於下月與爆紅新人王炎明熹（Gigi）舉行網上直播音樂會，距離演出日期只得一個月，她們心情好興奮，兩人還大爆邀請了同是「聲夢學員」的國民女神姚焯菲及張馳豪擔任特別嘉賓，JW笑言：「呢排天氣熱到大家都唔想出街，最啱留喺屋企開住冷氣聽我哋唱歌，都係一種享受，仲可以同我哋一齊Chill一晚。」Gigi就話：「可以同JW老師首次合作開網上LIVE騷，真係好開心。知道唔少人呢排生活都好緊張，希望我哋嘅歌聲可以令大家放慢步伐，一齊好輕鬆咁聽下歌。」