潘瑋柏肥到204磅出晒油　兩個月時間速減44磅

台灣天王潘瑋柏近年時肥時瘦，不過佢都Keep到人氣同Rapper地位，喺行內仍然佔首屈一指之席。素有「潘帥」之稱嘅佢，依家落得「潘胖」之名，佢自己都見唔多對路，決定肥仔大翻身，尋日（23日）佢就決定自揭醜照，上載肥到93KG（約204磅）嘅油膩照，去對比依家「7字頭」嘅靚仔相，真係睇到粉絲目瞪口呆！

潘瑋柏就自爆僅用2個月左右時間瘦身，搣走近20KG（約44磅）：「五月的時候，我到達了人生巔峰。93kg……經過一段時間的堅持，努力，毅力，我在#中國說唱巔峰對決#瘦到了7字頭。擔任解說員也『輕鬆』許多。 哈哈，繼續努力，為未來努力！但…能瘦多久呢？​​​」粉絲見到都嗌出嚟，仲幫偶像「解圍」笑稱佢之前都係肥嚟「玩吓」，最緊要依家青靚白淨番，粉絲就「安心」晒喇。