告別男仔頭！張曦雯突然「變長」重返女神之位

無綫花旦張曦雯（Kelly）去年尾為拍攝劇集《破毒強人》而「變髮」，狠心剪去一把長髮，不過外間反應好壞參半，有人大讚佢型格，但亦有網友指佢即時跌Watt，女神不再！ 不過早前佢現身新劇《白色強人II》宣傳活動，就突然轉眼間「變長」駁回長髮，呢日佢再喺社交網上載新一輯靚相，見着上綠色連身裙嘅佢充滿夏日氣息，重點係一把飄逸秀髮，令其顏值直線回升，即時回復女神地位。唔少人都大讚佢長髮Look更吸睛，好友高海寧（高Ling）仲話：「駁得好自然！」