生酮有道︱李幸倪連皮食至Fat三文魚　再配合斷食

歌手李幸倪（Gin Lee）近年身材愈來愈fit，原來全因開始進行生酮飲食有關，她表示當年有幸被安排和超級偶像張學友到台灣拍新歌《日出時讓街燈安睡》MV及唱片封套：「我想以最佳狀態去拍攝，嗰時一日食一餐，仲配合埋斷食，斷食幾長就要視乎我喺幾短嘅時間內達到一定嘅體重，而主食糧就係好Fat嘅三文魚、連皮嘅肥肉，仲有牛油果。」

她覺得實行生酮飲食要視乎個人體質做「功課」，雖然減肥效果快，且不用大量運動，但礙於餐單跟華人慣常飲食習慣相反，實行方面存難度：「生酮至少要70%嘅Good Fat，但係華人以澱粉質或碳水化合物居多，Good Fat嘅食物較少，食唔夠Fat同碳水化合物，人會覺得沮喪，情緒低落到喊，咁就好容易放棄，同埋嗰種瘦唔健康。」她又提醒進行生酮飲食時，如發現精神欠佳，人變得憔悴，可能跟營養不良有關，應諮詢醫生或營養師意見。