汪明荃望MIRROR受傷舞蹈員阿Mo大步檻過:主辦機構一定要負責!

2022年07月30日 20:51
東網電視
更多新聞短片
汪明荃今晚(30日)出席八和粵劇學院課程匯報演出,她表示粵劇界因疫情大受影響,望能早日復甦。她講到:「劇場入座率都唔係好好,因為有啲長者冇打針入唔到去睇,當然都希望能早日通關。」另外,講到MIRROR演唱會日前發生意外,舞蹈員被巨型屏幕擊中,有欣賞演唱會首場的她祝願傷者阿Mo大步檻過:「咁年輕嘅人,又咁靚仔,佢跳舞跳得幾好,我第一場留意到,希望佢冇事。我睇完佢出事條片,喺駕車一直係咁震。」她直言觀看時已感到驚險:「覺得唔係好隱陣咁,尤其嗰條橋,仲有幾個動作,Anson Lo向後倒都好危險,我哋做大戲都有嗰啲動作,下面都要鋪好多榻榻米,但佢哋好似冇。」
問到是否覺得紅館需要作出改善?她直言:「咁當紅嘅團唔需要整咁多機關,佢哋大場都未上過,冇經驗,做四面台唔簡單,藝人係要顧好多嘢,方向、走位、舞蹈,尤其佢哋跳快舞,人本身多,舞蹈員都多,我覺得佢哋都唔夠位跳,好迫,跳跳吓會好易跌落台,加上機關太多,排練時間少,你一下子上台要跳舞唱歌,唔熟個台好易行錯撞到,佢哋係未Ready,我嗰日(第一場)睇得開心,佢哋好年輕同有才華,幾好。(令你上台有陰影?當年林子祥喺你個騷跌落窿。)嗰次佢聽唔到,我喺下面Standby,觀眾好興奮,佢一直向後退,所以跌咗落去,戴咗耳機係聽唔到,只聽到音樂。(你將來上紅館開騷會唔會擔心?)唔會,要檢查,每個部門要做好自己準備,要排多少少,佢哋12人走位多好多,我哋一個人唱十幾分鐘先轉位,佢哋出出入入好多,冇經驗嘅人做四面台係唔容易,要用多啲功夫顧唔到咁多,啲機關唔應該咁樣。(作為前輩點鼓勵佢哋?)最緊要小心,唔只係藝人,最重要主辦機構一定要負責,搞到咁大件事,未試過,咁年輕冇必要。」
問到有否聯絡Edan(呂爵安)?她坦言跟對方不大熟悉,反而丈夫羅家英有慰問對方,她則有問候ViuTV高層金廣誠,但對方可能忙於善後,未有回覆她。講到粵劇安全問題,她說:「度度都要安全,搭超過三呎布景都買保險,好嚴。而且我哋冇咁多機關,上次家英哥演《英雄叛國》喺三呎台跳落嚟,第一場之後覺得太危險,佢要打個觔斗落,所以就取消咗,太危險唔應該做。」