兒子長沙陪老婆楊千嬅　丁子高留港孤獨瘦

藝人黎諾㦤、陳柏宇及丁子高今日（5日）出席慧妍雅集慈善羽毛球賽，三人分別代表不同隊伍作賽，他們身為星爸，同聲表示沒有特別訓練自己的小朋友，諾㦤笑指兒子「小春雞」喜歡彈琴，故暫未發掘到他的運動細胞，認為開心最重要。

丁子高則透露10歲大兒子Torres有學游水，認為集中一樣興趣更好，更指兒子身在長沙陪太太楊千嬅：「佢同表姐一齊玩，最近仲學埋溜冰，啲親戚又一齊去埋長沙，好熱鬧，我就一支公喺香港做嘢，暑假陪唔到佢，不過我遲啲都上去會合佢哋一齊過中秋。」瘦了一圈的他，問到是否努力Keep Fit？他笑說：「冇嘢做咪做運動囉，呢啲叫孤獨瘦呀！」

而柏宇就爆料指3歲女兒吹水最叻，問到是否遺傳？他說：「佢係似我，不過比我更青出於藍，要求佢做嘅嘢，佢識得同你討價還價。（鍾唔鍾意唱歌？）鍾意，平時聽兒歌同韓文歌多，冇聽過我嘅歌，我覺都係唔好聽我啲歌喇！」