發夢掛住第2個男人!張曦雯破不婚宣言 認定男友等嫁

2022年08月06日 00:01
東網電視
更多新聞短片
「長腿花旦」張曦雯(Kelly)在無綫熱播劇《白色強人II》與安仔發展成戀人,劇中她迷戀及崇拜對方,戲外依然入戲,她自爆:「套戲拍完咁耐,近排我仲夢見YT(郭晉安角色)死咗,跟住喊醒。男朋友問我乜事,我照講畀佢聽,佢只好安慰我唔係真嘅。」
能夠在男友面前坦白為另一個異性魂牽夢縈,全因Kelly有個了解她及處處包容自己的摯愛:「我係YT嘅『小迷妹』,現實生活中同男朋友嘅關係就剛好掉轉,經過磨合後,佢接受我工作忙,開劇嗰段日子會坐喺屋企離魂唔理佢。佢真係好好,冇特別唔好嘅嘢。」
而提到早前為劇集剪短髮,一度被指女神幻滅,Kelly指男友依然力挺:「當時我都覺得佢好慘,成日要望住咁嘅我,估唔到佢竟然話我短頭髮好靚,仲話凸顯到我條頸嘅美感,我心諗:『即係我剃光頭你都話靚啦!』(呢段感情無風無浪?)唔係,其實我哋細個嘅時候約會過,但分咗手,冇諗過會再喺番埋一齊!」
曾幾何時,Kelly是個不婚主義者,明言即使懷孕亦不打算步入教堂,不過男友如今令她這顆頑石點頭:「一齊咗咁耐,都覺得應該係佢喇!(有傾過?)佢講過,不過屋企人冇畀壓力。(一齊經歷過難關?)我哋會用愛支持大家,尤其係我之前喺美國確診,我喺地牢隔離,佢隔住一隻窗仔同我見面,又擔心如果自己染疫,會傳染埋畀我父母。後來返到香港,我哋一齊隔離21日,日對夜對都擔心有摩擦,點知又好OK喎!」
Credits﹕
Clothes: Loewe
Hair: SingTam@ArtifyLab
Makeup :Janice Lam (Glow makeup academy)
Stylist: @wwchezw
場地:十八夢