黃劍文生日收粉絲厚禮大嚇一跳

昨日是歌手黃劍文生日，日前他與粉絲提早開派對慶祝，藝人林希靈、陳安立、劉智衛應邀出席，希靈更自製「醉愛黃劍文」燈牌，而劍文的家人亦有參與，令他感到驚喜：「起初我都係問吓佢哋嚟唔嚟，點知佢哋一口答應，有屋企人陪住過生日梗係特別開心！（有冇被長輩催婚？）我哋家族好大，佢哋已經好多『孫仔』要見面，所以唔會逼我，反而畀我自由咁追夢。」

每年他都與粉絲共渡生日，當日有半百粉絲出席，他一口氣連唱十多首歌報答歌迷，猶如小型音樂會，他說：「有粉絲送結他畀我做生日禮物，大手筆令我嚇一跳！」他將會飛到美國工作，但揚言速去速回：「因為屋企嘅貓貓都病晒，都唔想去，但人哋邀請咗幾次唔去唔得，所以靠經理人幫手日日餵貓，我叫佢要拍片同視像通話，我應承咗啲貓貓，一做完嘢就返嚟陪佢，所以唔會考慮玩多幾日。」

早前紅館發生意外，他坦言擔心傷者情況，但認為純粹個別事件：「因為香港整體表演場地都係安全嘅，所以再去表演都唔會太擔心。呢刻大家畀多啲空間傷者同家人，亦比啲時間MIRROR成員消化成件事，畀啲空間佢哋。」