吳浩康出騷獲大批粉絲撐場:好耐冇現場演出緊張瞓唔着

2022年08月06日 18:01
東網電視
更多新聞短片
歌手吳浩康(Deep)與劉威煌等,今午(6日)出席Mira Place Gimme LiVe音樂節10周年「五音十色」作現場演唱,吸引大批粉絲撐場。Deep透露已有兩、三年未試過類似演出:「所以事前真係要練多啲,尋晚都瞓唔着,心情有啲緊張,頭先嚟到綵排見到粉絲,覺得自己要重新適應。」他早前受訪,明言自己有個「不死紅館夢」,當談到MIRROR演唱會意外,他說:「其實我個夢仲好遠,擺埋一邊先,現階段講咩都冇用,淨係希望傷者能夠康復。所有當事人都平安度過。」
他又坦言最近開始籌劃重啟網上直播:「嚟緊會拍啲關於露營嘅片。(同太太一齊?)難啲,佢之前覺得暈已經好小心,呢兩個月只係去過兩、三次街,最近去BB展又覺得暈,都係小心啲好,一係同佢喺屋企拍開箱片囉。同埋我都好鼓勵佢拍BB片,話晒之前做咗好多功課,可以同人開心分享。」
劉威煌透露疫情下自己亦做了4隻歌:「不過因為我依家冇唱片公司,都唔知點樣發布新歌比較好,但今日我都會唱其中一隻關於獅子座嘅歌,我本身都係呢個星座。(就嚟生日喎。)係,但我已經唔係好想慶祝,生日願望係希望時間過慢啲,同埋唔想咁快又一年,依家覺得體力大不如前,加上有小生意,時間好唔見用,新陳代謝又慢咗,開始有小肚腩!」