港姐特訓︱19歲林泳怡退賽　隨時空降後補佳麗

2022年香港小姐候選佳麗今日出發往愉景灣進行特訓，原本20名佳麗，但只有19人現身，港姐統籌經理何小慧透露（6）林泳怡退賽：「昨晚接到佢通知，佢以學業理由退選，我哋同佢溝通過，佢今年19歲升大學，佢本人同大學傾過，話冇可能參加到準決賽同決賽，同家人商量過後，決定以學業為重，所以退出比賽。（會唔會安排後補佳麗？）星期一會同曾志偉及樂易玲商量，到時會公布。」另外，她表示今次特訓為期7日，佳麗們會接受麥秋成、Sunny Wong及趙增熹的歌舞訓練，但特訓期間不設淘汰環節，屆時會拍攝花絮及泳裝照。

另外，講到（14）梁超怡有紋身，她坦言近年不少佳麗都有紋身，但入圍與否視乎紋身大細：「面試時見到，我哋有問佢原因，個紋身咁細都OK，而且位置唔係太顯眼。」至於（3）陳瑞菱因做手術而在胸下至肚皮位置留下長疤，問到會否為她特別設計泳衣遮掩？她說：「唔會刻意咁做，條疤望落唔係太驚嚇，所以佢會照着三點式，而且畀人感覺好正能量，佢經歷生死都可以企出嚟，真係唔容易。」