曾與楊洋齊名︱董子健宣布離婚　孫怡不忿：遠離男人

曾與爆紅男星楊洋、吳亦凡、鹿晗列為中國四大小生、內地著名經理人王京花仔仔董子健，今日（8日）忽然宣布同藝人太太孫怡離婚，為5年婚姻畫下句點。二人2016年官宣拍拖，翌年閃婚並於同年9月誕下囡囡，成為圈中模範夫妻，可惜卻突然無預警下互Tag對方，董子健留言：「咱都好好的！」孫怡留言：「從前祝我們，今後祝你我。」此情不再。

曾入圍金馬影帝嘅董子健，除演技精湛外，亦好有商業頭腦，佢成立嘅三樂影業早年投資《捉妖記》狂賺29億元人民幣（約32.65億元港幣），當年出畀員工「百萬年終獎」，更一度被網友戲稱為「任性總裁」。而孫怡就因演出《羋月傳》中「羋瑤」一角走紅，現年27歲嘅佢被稱為「零濾鏡女神」。

如今二人離異消息震撼中港台三地，雖然董子健工作室發聲明宣布兩人和平分開，不過就有網友指孫怡7月曾晒出自拍，手機殼有「遠離男人」字樣，顯得格外敏感。6月4日孫怡生日，佢只晒出同囡囡切蛋糕相，董子健僅於社交網稱呼對方「大福媽」賀壽，被指夫婦感情變調似乎有迹可循。