港姐2022︱趙增熹狠批佳麗五音不全 麥秋成都聽到一額汗

2022年08月08日 17:37
東網電視
更多新聞短片
資深音樂人趙增熹及排舞師麥秋成為本屆港姐擔任導師,談到今日(8日)首次與一眾佳麗見面,及聽她們展歌喉,趙增熹受訪時眉頭一皺,坦言今次任務艱巨:「14位佳麗只有1個半個唱啱音,好彩仲有時間追,希望喺嚟緊一個月之內趕到進度,有大奇迹發生。」他直言佳麗們唱歌主要是「唔夠氣」,有人甚至五音不全,但問到那位「最難忘」,他笑答:「唔記得咗。(有冇鬧人?)我出名惡,不過冇鬧人,只係大聲講嘢啫。(教到想嘔血?)又唔會,盡力而為,但如果一個月見到佢哋有進步,又會有好大滿足感,我講我呀。(有冇後悔答應出任導師?)監製整蠱我,同時亦整蠱緊佢自己。」他預告不會經常出現在佳麗們眼前:「會交畀我嘅拍檔同佢哋做vocal training(聲音訓練),我咪巡吓咁囉。」
至於麥秋成則笑言:「我頭先旁觀班佳麗唱歌,節奏感已經令我一額汗,嚟緊希望用啲道具輔助吓佢哋,不過要唱加跳其實都幾辛苦,要唱啱音又要跳得準,對佢哋同對我都係挑戰,希望鞭策下有神迹出現啦。(咁多靚女埋身,使唔使同太太湯怡講聲?)唔使,冇人揮得低佢,不過我都請咗位女助手指點佢哋嘅姿勢,始終跳舞會有身體接觸嘛。」