郭奕芯大讚男友孝順有事業心　預告會合作開公司創業

近日公開戀情的女星郭奕芯(Ashina)，孖住拍拖數月的富二代新歡Brian Law出席有份演出的《師傅七都識唱笑會》拜神。對於七仙羽師傅著她每日唸經及做善事，終覓得新戀情，還爆料指非常富有，Ashina坦言自從拜師傅為師後便好運不斷，工作範疇多多，從中也認識到搞藝術的男友。她指新聞曝光後才知男友有錢：「依家要收埋佢，我擔心，我好欣賞佢孝順同有事業心，又真誠同好錫我，我哋合作搞公司，我負責幫佢打氣。」而Brian則大讚Ashina為人善良，私下的她與鏡頭前判若兩人：「外界覺得佢性感，但呢啲都係工作需要（你介意？）如果工作需要，佢想做就做，我絕對支持。」

問到Ashina會否收起性感？她表示從來沒有刻意走性感路線，平時也打扮隨意，如同男人般，一點也不能與性感扯上關係，但偶然也會視乎場合而性感上陣。談到拍拖數月是否已見家長？Brian直言女友深得母親喜歡，經常問她會否前來食飯，Ashina亦笑指母親對Brian印象甚佳。