對住陳凱詠動真情　趙學而棉胎拖尾自嘲行動不便

首次合作的歌手趙學而及陳凱詠（Jace）偕舞台劇演員梁祖堯（阿祖）、湯駿業（AhDee）及邵美君（阿君）同演出舞台劇《隔離童話集》，學而以一個超浮誇的造型示人，令她在台上一步一驚心：「今次套衫有一條好長嘅拖尾，好似一張雙人棉枱咁大，另外仲有一件外套係用好多鐵絲做成，好重，再加埋一個梳得好高嘅頭，好搶眼。我喺台嘅走動係比較路途遙遠，因為要着一對15cm高嘅鞋，然後要行一條好長嘅樓梯，會比較吃力少少，不過大家都好好，兩旁都有演員喺度，大家都會顧住我嘅安全。」

學而與Jace都十分入戲，在綵排期間已動了感情流下真眼淚，而正式公演時，兩女一樣眼濕濕喊住唱歌，學而表示有一定難度：「無論鬧交戲、開心戲都係真感情嚟嘅，冇感情做唔到㗎！因為嗰場戲係好感動，感動到兩個人都眼濕濕，當中最難係好想喊時但又要唱歌要Hold住情緒，如果唔係就唱到喊住口。」

Jace也心同感受，並說：「絕對會係動咗真感情，因為每一次做戲都係用真感情去帶動，而我亦覺得好開心，今次能夠同前輩學而合作，亦有風車草3位（阿祖、AhDee、阿君）教導我，每次排戲時可能都有嘢唔同，但每一次都好真摯，好感受到每次做舞台劇，大家嘅靈魂好真摯地去交流，覺得呢樣嘢係好珍貴，所以好多謝佢哋教我去試多啲，唔需要怕。」