陳敏之囝囝幼稚園畢業　創作力好鍾意畫畫同音樂

商界美女胡曦文與男友羅御軒今日（13日）舉行元宇宙慈善活動，邀來不少藝人及家屬包括陳敏之與囝囝、張繼聰一家等繪畫熊貓，「變身」卡通動畫。

敏之事後孖住胡曦文受訪。談到囝囝畫功，她表示：「佢好鍾意畫畫同音樂，創作力比較好，呢幅畫畫咗個幾鐘左右啫。」她又透露囝囝幼稚園畢業：「佢完成咗K2課程，結業禮我都眼濕濕。下學期佢會轉去國際學校，我冇咁辛苦之餘，覺得課程會啱佢。（再生？）我咁嘅年紀難啲喎，生得嚟未必夠小朋友跑，隨緣啦，如果真係有，係好大嘅禮物。」

於原宇宙動畫內，胡曦文男友化身卡通人物，背面手拿玫瑰現身，事前更揚言「有驚喜」，令人聯想到求婚可能，但最後只是空歡喜！敏之說：「我都以為係，諗住攞相機出嚟拍低重要時刻。」胡曦文說：「唔會啦，依家經濟差、氣氛又唔好，冇人想嚟我哋嘅婚禮。（有共識？）共識就唔好結住。（拍咗拖幾耐？）識就好耐，拍拖都係呢幾年嘅事，等佢再經歷吓考驗吓先啦。」