同謝安琪合作愉快想開埋巡迴騷 方皓玟自爆有意對親家

20220815
東網電視
更多新聞短片
歌手謝安琪(Kay)與方皓玟(Charmaine )一連兩晚在亞博舉行演唱會,昨晚(14日)順利完成尾場。騷後兩人表示合作得很開心,Kay説:「本身我哋識咗好耐,呢個騷令我哋了解對方多咗,我哋喺音樂同聲線上都合作得好好,喺舞台上互相支持,多謝導演揀嘅歌好有意思,令我哋好投入同享受。」Charmaine則表示很希望能繼續合作,她説:「可以巡迴更加好,帶埋小朋友一齊去當旅行。」她表示4歲兒子今晚也有到場,還已介紹予Kay的5歲女兒認識,被問到是否對親家,Kay笑稱自己女兒雖較年長,但絕不介意,而Charmaine亦搞笑表示:「唔緊要啦,姊弟戀係OK㗎!」她又爆兒子很喜歡看騷,更自薦想上台唱歌:「我同佢講大個啲先,背熟阿媽啲歌詞先,佢最鍾意唱我首《Freedom》呀,係咪Feel到佢平時對住我係幾咁辛苦,要唱呢啲歌嚟抒發自己,哈哈。」她稱兒子是快樂小孩,喜歡結交朋友,將來能成為一個開心善良的人她便心滿意足。
至於今次演唱會的服飾亦成為亮點,Charmaine的服裝在胸下位置開窿極為養眼,更有觀眾指她的性感程度比Kay更勁, 2人即笑稱彼此從沒有比較,Charmaine笑言:「喺我心目中大家都咁勁!」Kay則補充説:「一般性感啫,我哋嗰兩件西裝褸嚟,穿咗窿涼爽啲嘛。」鑑於之前MIRROR演唱會發生意外,今次演唱會的舞台設計亦作出相應調整,包括將所有螢幕固定於牆上、天花射燈數目減少,舞台亦比原先設計降低了高度,而所有舞台機關亦一併取消,Kay讚揚大會燈光師受眾多限制下,仍能營造出如此亮麗效果,對此萬分感謝。