「復出」大銀幕！古巨基驚喜客串　大讚姜濤有潛質

藝人古巨基自疫情以來「神隱」專心湊仔，至近日開始活躍，早前與呂爵安（Edan）合唱《漂流教室》，一日錄得點擊超過30萬，成績斐然。原來這段時間基仔亦有低調客串演出英皇電影《阿媽有咗第二個》。戲中他「演回自己」，劇情交代基仔於錄音室內碰上前經理人毛舜筠（毛姐），對方剛巧帶剛出道的姜濤前來錄歌。飲水思源的基仔隨即擁着毛姐敍舊，感慨表示畫面與自己出道時無異，又大讚姜濤這位師弟有潛質。

隨後電影畫面更交代基仔與姜濤合唱，而毛姐家中擺放着以往與基仔的合照，相當溫馨。電影公司宣傳期間未有發放基仔客串的消息，難怪近日戲迷入場睇戲，大感驚喜。有細心的粉絲更翻出多年前基仔扮應餐廳侍應的劇照，與今次姜濤的「侍應Look」拼照一起，同樣清澀。據悉，自2015演出電影《衝鋒車》後，基仔多年來絕迹電影界，今次為姜濤獻出「復出第一次」，電影上映時又主動在社交平台幫手宣傳，身體力行支持後輩，十分有心。