周杰倫捧5歲仔Romeo做MV男主角　網民力推順勢出道

台灣天王周杰倫（周董）新碟《最偉大的作品》大受歡迎，其中5歲囝囝Romeo不但為《粉色海洋》獻聲，昨日（15日）MV上架，估唔到原來Romeo仲擔任埋男主角，兩父子分別戴上黑超出海，並彈奏Ukulele，一個型格，一個可愛，兩父子各顯神通。今次MV去到西澳取景，仲去埋著名景點「藍色小屋」，畫面唯美。

而同時擔任MV導演嘅周董悉心指導下，Romeo一時喺沙灘上奔跑，一時單手轉帽，一時又喺遊艇上手持方向盤扮揸船，最後仲壓軸獻上飛吻，天真無邪同時充滿自信，盡得天王爸爸風範，十足「小周董」一樣，網民即力推Romeo出道，甚至笑指MV已經係其出道作，不過周董就認為小朋友仲細：「以後還是看他自己的興趣。這支MV讓他入鏡，是想說小孩子成長得很快，想記錄一下他可愛的樣子！覺得讓Romeo出現在自己的MV是不錯的idea！而且這支MV剛好也很適合。」