艾妮賀師姐Twins成軍21周年 翻唱經典金曲Medley

2022年08月16日 20:01
東網電視
更多新聞短片
今年是Twins成軍21周年,昨日更是她們推出首張專輯的日子,同門師妹艾妮(Elly)便孖小師弟黎展峯(Andy)翻唱Twins金曲Medley的短片上架,為師姐慶祝一番。原來這次的錄音及拍攝全是Elly自資,除了慶祝Twins出道21周年,又歌癮發作想跟大家回味Twins的金曲,提到找師弟Andy合唱,Elly搞笑道:「我係『誘拐』佢嚟同我一齊合唱,當初因為想將師姐嘅歌轉成男女合唱試吓個感覺,咁啱又知公司有男新人出道,而且夠高key,所以就搵咗Andy嚟幫手。我仲記得佢同我講:『師姐,我想做呀,但我無咩budget,點算。』我就話:『唔怕,你嚟錄音室就得㗎啦,姐姐幫你度掂佢,就係咁成功『誘拐』咗Andy嚟同我合唱。」
P2]
對於Elly的「誘拐」,Andy坦言surprise:「因為本身只係諗住搵Elly師姐一齊拍吓片,點知佢直接話一齊合唱cover。同埋平時我都有睇開佢嘅cover片,覺得好好聽,所以今次可以同佢一齊合唱超開心。遲啲我一定會邀請佢同我一齊拍做運動片,報答番師姐。」Twins的歌曲中,Andy自爆《愛情當入樽》是他減肥的力量,他說:「因為細個時候一聽到首歌就會好想去打籃球,所以呢首歌都算係推動我減肥嘅一股力量。雖然今次medly入邊無唱,但希望遲啲仲有機會唱俾大家聽。」
有傳Twins會舉行演唱會,Elly表示十分期待:「有嘅話一定會睇,集體回憶喎,我都係聽師姐嘅歌大㗎。」Andy同樣是聽Twins的歌成長,問到會否想合唱,Andy說:「我可以同師姐合唱《死性不改》呀,大家記得幫我出呢句,希望師姐睇到。雖然未知會唔會有演唱會,但我都好期待。當陣時基本上身邊嘅同學朋友都係聽住佢哋嘅歌大,或者去唱K都會唱佢哋嘅歌,就算唔啱key走晒走都照唱。」