寶貝仔Kuson送上生日驚喜　 古巨基冧到暈：I Love you！

藝人古巨基（基仔）一向都係「絕世好爸」，對囝囝Kuson錫到燶，不時喺社交網分享囝囝嘅生活點滴。今日（18日）係基仔50歲生日，佢喺社交網分享咗一條短片，一開場佢話：「有個小朋友唔畀爸爸出客廳，話要準備一個驚喜畀我，數3聲先可以入去。」點知基仔一打開門，阿仔Kuson就手舞足蹈向佢唱生日歌，非常可愛，搞到基仔心都融晒，大聲向呀仔示愛：「I Love you！」

不過Kuson嘅驚喜仲未完，佢親手畫咗張「Happy Birthday」橫額畀爸爸，氹得基仔勁冧，追住Kuson錫錫，場面溫馨。而基仔仲喺貼文寫到：「上兩年的生日，Kuson還未太懂說話，所以這是我第1次聽他為我唱生日歌，也是我這輩子聽過最好聽的生日歌！」