有片有真相︱區永權第3度遭鄰居高空擲物呻慘

《東張西望》主持區永權（Albert）今年1月受樓上鄰居高空擲物滋擾，有人將吸塵機棍由高空擲下，仲撞崩佢露台邊位；3月時再「天降」雜物，當中包括雨傘，衝力更能夠導致佢露台成塊地磚破裂，真係嚇壞人！雖然兩次事件佢都有出Post譴責，但似乎佢嘅惡鄰居都少理，尋日（19日）佢再次晒出成地索帶嘅片及相，見到一條條索帶從天而降猶如落雨，掉落到佢露台位置，靚景即時變垃圾收集站。

佢再次留言，今次佢同樓上理論時，更被對方無禮對待，就算Call埋管理員幫手勸都搞唔掂：「喂喂喂，樓上又來啦！都明白，拆棚時候，有好多嘢都需要兼顧，最重要係安全至上！但正當管理員向你溫馨提示，叫你盡量注意一下，因為其實樓下有住客係遭其殃，露台承接晒你所有索帶嘅時候。你竟然理所當然兼理直氣壯地，仲話：『咁拆棚係咁㗎啦！』嘩！呢個態度，簡直係無得頂！明明好嬲，但又好好笑！結果，你拆棚，我善後！幫你執晒所有手尾囉。」