湯鎮業孖女首次行Catwalk　超模氣質媲美湯洛雯

昔日無綫五虎湯鎮業同細25歲嬌妻鄒文靜育有一對雙胞胎女兒湯樂欣、湯樂怡，舉家定居內地，已經有一對孖仔湯君慈（Bruce）及湯君耀（Chris）加入演藝圈嘅湯鎮業，原來佢一對孖女都亭亭玉立，日前更客串上舞台首次行Catwalk，完全睇唔出兩個囡囡只係得14歲，湯鎮業亦放上短片平台吸Like及留言：「女大十八變！走上T台，氣場全開的Twins！」網友睇完啲相，即大讚佢兩位千金同哥哥湯鎮宗嘅愛女、港姐出身嘅湯洛雯有得揮，呢個演藝世家分分鐘可以稱霸藝人界。